Kryeparlamentari Krasniqi priti përfaqësuesit e Shoqatës për Dëmet e Luftës, “Ngritja e Zërit”

Kryetari i Kuvendit të Republikës së Kosovës, dr. Jakup Krasniqi, priti sot në një takim përfaqësuesit e Shoqatës për Dëmet e Luftës në Kosovë, “Ngritja e Zërit”, me qendër në Skënderaj, me të cilët bisedoi rreth kërkesave që kjo shoqatë ua ka adresuar institucioneve të Kosovës.

Kryetari i shoqatës, Jahir Bejta, parashtroi kërkesën për futjen e kësaj shoqate në grupin për dialog me Serbinë, në cilësi të shoqërisë civile, ose që, të paktën, në agjendën e bisedimeve të parashihet edhe çështja e kompensimit të dëmeve të shkaktuara gjatë luftës dhe në periudhën para saj. U kërkua, gjithashtu, gjetja e mundësive dhe formave të financimit, për shtrirjen e shoqatës në të gjitha qendrat e Kosovës.

Kryeparlamentari Krasniqi i falënderoi përfaqësuesit e kësaj shoqate për informacionet dhe i përgëzoi ata për punën që e kanë bërë. Kreu i Kuvendit shfaqi mirëkuptim ndaj kërkesave të tyre, por sugjeroi që ato të adresohen në institucionet ekzekutive të vendit.

Sidoqoftë, kërkesa do t’i delegohet edhe komisionit përkatës të Kuvendit.